Замын-Үүд сум, хот байгуулалтын хөгжлийн ерөнхий төлөвлөгөөтэй болно


Дорноговь аймгийн Замын-Үүд сумын төвийн хөгжлийн ерөнхий төлөвлөгөөний техникийн баримт бичиг боловсруулах, ажлын зураг төслийн үе шатуудад бодлого, арга зүйн зөвлөгөө, удирдамж, чиглэлээр ЗТБХБ-ийн сайд 2009 онд 351 тоот тушаал гаргаж, үүрэг өгсөн.

Энэхүү ерөнхий төлөвлөгөөг хангах үүрэгтэй ЗТБХБ-ийн дэд сайд Т.Пүрэвдоржоор ахлуулсан ажлын хэсгийн гишүүд, Засгийн газрын хэрэг эрхлэх газар, Сангийн яам, Хууль зүй, дотоод хэргийн яам, Төрийн өмчийн хороо, Үндэсний хөгжил, шинэтгэлийн хороо, Мэргэжлийн хяналтын ерөнхий газар, Хил хамгаалах ерөнхий газар, Гаалийн ерөнхий газар, Зам, тээвэр, барилга, хот байгуулалтын яам, түүний харьяа агентлагийн удирдлагууд, Замын-Үүд хотын ерөнхий төлөвлөгөөг боловсруулах зураг төслийн гүйцэтгэгч байгууллагын төлөөлөл бүхий 50 орчим хүний бүрэлдэхүүнтэй ажлын хэсэг өнгөрсөн нэгдүгээр сарын 15-ны өдөр Замын-Үүд суманд ажилласан юм.

Замын-Үүд бүсийг хариуцсан Засгийн газрын бүрэн эрхт төлөөлөгч Ч. Баатар
«Бид өнөөдөр түүхэн чухал үйл явдлын гэрч төдийгүй, ирээдүйн их бүтээн байгуулалтын суурийг тавих, бүр онцолбол Замын-Үүд хотын ерөнхий төлөвлөгөөг гаргахад шаардлагатай бүх зүйлийг газар дээр нь үзэж орон нутгийнхантай хамтарч шийдвэрлэхээр ирсэн ажлын хэсгийнхэнтэй санал бодлоо солилцон зөвлөлдөж байна. Замын-Үүдийн хөгжил нь зөвхөн энд оршин суугаа бүхэнд хамааралтай бус Монгол Улсын иргэн бүхэнд хамааралтайгаараа бусад сум хотуудаас онцлогтой. Тиймээс ч төр засгаас онцгойлон анхаарч улсын төсөв, төлөвлөгөөндөө тусган, бүтээн байгуулалтыг эхлүүлэх гольдролд орсны нэг бодит илрэл нь өнөөдрийн энэхүү хүрэлцэн ирээд байгаа томоохон бүрэлдэхүүнтэй ажлын хэсэг юм хэмээн онцолсон юм.

Харин ЗТБХБ-ийн дэд. сайд Т.Пүрэвдорж
Хууль дүрмээрээ бол аймаг орон нутгийн хөгжлийн ерөнхий төлөвлөгөөг орон нутаг өөрөө зохион байгуулж хийлгэдэг. Гэтэл Засгийн газар, ЗТБХБЯ, холбогдох агентлагуудын удирдлагыг багтаасан ажлын хэсэг байгуулагдан Замын-Үүд сумын хөгжлийн ерөнхий төлөвлөгөөг хийлгэхээр газар дээр нь ирээд хэлэлцэж байна. Энэ нь Замын-Үүд өөрөө Монгол Улсын стратегийн ач холбогдолтой бүс нутаг болохыг илтгэн харуулж байна» хэмээн хэлсэн.

Ажлын хэсгийнхний хэлэлцсэн гол асуудал нь суурингийн баруун талд байх улсын хил хамгаалалтын торон саадыг цаашлуулан газар нутгийн хэмжээг тэлэх, суурингиин зүүн талаар явах мянганы замын трассыг хилийн торон саадруу 120 метр ойртуулан өөрчлөх зэргийг шийдвэрлүүлэхээр төслийг боловсруулан засгийн газарт санал тавьсан байна. Мөн шинээр байгуулахаар төлөвлөгдөж буй ложистик терминалуудыг нэгтгэн төмөр замын баруун талд төвлөрүүлэхээр тогтож, Замын-Үүд сумын талаар авах арга хэмжээний тухай Засгийн газрын тогтоолын төслийг ч хамт шийдвэрлэхээр ажиллаж байгаа аж.

Хэлэлцүүлгийн дараагаас Замын-Үүд хотын ерөнхий төлөвлөгөөг боловсруулах зураг төслийн гүйцэтгэгчээр шалгарсан Монгол Америкийн хамтарсан /Т&G, Хот байгуулалтын хүрээлэн, Айском/ консерциумын ажилтнууд орон нутагт ирж ард иргэд, аж ахуйн нэгжүүд, төрийн албан байгууллагуудаас ерөнхий төлөвлөгөөнд тусгуулах саналуудыг сумын ЗДТГ дээр авч эхэлжээ. Хотын хөгжлийн хэтийн төлөвлөгөөг боловсруулах ажлыг тавдугаар сард багтаан дуусгах ёстой аж.

© Замын-Үүдийн Засаг даргын тамгын газрын захиалгаар хийж гүйцэтгэв.